游蕙祯旗袍look　被闹自相矛盾

游蕙祯近日与友人一同拍摄旗袍照(左图左一)，引起网民讨论。右为她于农曆新年时曾以一身华服现身自嘲「油鸡」拜年。(互联网)

　　【熊猫时报讯】青年新政游蕙祯因宣誓辱华而被法庭取消立法会议员资格之后，久未露面。近日网上流传一张游蕙祯同友人一同拍摄嘅旗袍照，随即就引起网民激烈讨论，更有人大闹游蕙祯一面支持港独、话要摆脱华夏文化，但又身穿旗袍拍照，系自相矛盾。游蕙祯接受查询时就解释，旗袍系香港旧有服饰，叫大家唔好太敏感。

　　2日有网民就贴出一张游蕙祯同友人一同拍摄嘅旗袍照，身穿黄白色旗袍嘅游蕙祯如同模特儿摆出姿态，而游蕙祯招牌嘅啡金色头髮亦染成黑色。有网民就留言问游蕙祯系唔系转行做模特儿;亦有人质疑游蕙祯话要摆脱华夏文化，但又身穿旗袍拍照有矛盾;更加有人对佢嘅身材大肆批评。

　　游蕙祯接受查询时就话，相片系近日同友人一齐影，影完朋友就Post左上facebook，都唔介意畀大家见到;佢又话唔系改玩中国风，旗袍系旧香港服饰，叫大家唔好太敏感。其实游蕙祯都唔系第一次着唔同嘅服饰，好似佢农曆新年时就曾经以一身华服现身，自嘲系「油鸡」同市民拜年，睇嚟游蕙祯每隔一段时间就会有唔同Cosplay(角色扮演)装扮示人，所以都唔使少见多怪。