高铁审议乱成一团　泛民建制玩残一地两检

建制与泛民议员在委员会上问题多多。(设计图片)

　　【熊猫时报讯】立法会《广深港高铁(一地两检)条例草案》委员会昨日(4日)开会，审议有关高铁西九龙站实施一地两检嘅条例草案。一班民主派问题多多，一时问如果有人喺西九龙站发现杀人同藏尸案点处理，一时又问如果想喺车厢结婚又点，就连建制派议员蒋丽芸(Ann)都玩埋一份，问当局如有人喺高铁车厢中被性骚扰，应该喺边度报警好。通过条例草案嘅“死线”已经迫在眉睫，但系泛民同建制派议员就齐齐玩残佢，条例草案想如期完成三读真系危危乎喇!

　　为赶三读“死线”，委员会在周末都召开4小时会议，而周一8小时会议就系最后一次会。虽然时日无多，但班议员睬你都傻，继续玩嘢，喺会上大问“情境题”，搞到高铁车厢好似乱成一团。

　　议员陈志全问，如果有人喺草案生效前，于内地口岸区杀人同藏尸，但喺草案生效后先被发现，咁香港警方有冇权力调查?议员谭文豪就问，如果有人想喺车厢或西九龙站内地口岸区结婚得唔得?未婚嘅陈淑庄都突然“搭嗲”，话最极端嘅例子就系佢喺车厢度结婚喎。见大家讲得兴致勃勃，会计界议员梁继昌都加把嘴，话自己系香港合法嘅婚姻监礼人，如果有两名香港人想喺高铁车厢举行婚礼，佢系咪有权为佢哋监誓?两人签署香港结婚证书又系咪有效呢﹖法律政策专员黄惠冲惟有不厌其烦咁话，如车厢系喺内地司法管辖区就要睇返内地系咪承认，仲叫佢哋征询返内地专业法律意见。

　　咪以为问题多多系民主派专利，阿Ann都玩埋一份，问若喺高铁车厢中发生性骚扰事件，应该喺内地定香港报警?黄惠冲就答，不论高铁正北行定南行，都已非香港境内，故此将会按内地法律处理。

　　一班议员问唔停，委员会主席叶刘淑仪就讲明要喺周一完成审议，政府当日需回应议员提出多达42项嘅修正案并交付表决。佢希望本月25日可将草案提交内务委员会，然后提交大会恢复二读。不过就算一切顺利，预计最快都要本月底至下月初先可以喺大会二读，有民主派议员已扬言会再提修正案，但系6、7月只有6次大会，故此系咪可以赶及7月中大会休会前完成三读，仍有危机。