美斯终入波！阿根廷出线撼法国

【熊猫时报讯】美斯命不该绝，阿根廷完场前仅胜尼日利亚，惊涛骇浪出线16强!球王美斯上半场攻入一球，但换边后马斯真兰奴禁区鲁莽犯规输12码遭追平，阿根廷成班波又谢晒，球队之后虽然换入阿古路，但踢得都唔似样。完场前4分钟，马高斯卢祖福至心灵射入靓波赢2:1，惊险到爆反压尼日利亚以次名出线，16强将大战法国。

　　今场系名符其实嘅生死大战，出番希古恩同迪马利亚打正选，美斯坠后较炮，佢于中段时间接应班尼加靓传狂抽搞掂，信心返晒嚟，之后主射罚球更加中柱，半场领先一球。点知换边后冇耐，马斯真兰奴于禁区犯天条，域陀摩西斯射入12码扳平。阿根廷一路都唔似样，仲有马高斯卢祖禁区犯手球，但球证睇完VAR冇判12码。完场前卢祖接应右路传中第一时间抽入，助阿根廷奠定胜局赢2:1，以四分反压三分嘅尼日利亚，以次名出线。另一边厢冰岛1:2输畀克罗地亚，克军取9分首名出线，将斗丹麦。